दुभाजकाचे पत्थर करिती
चिंता अपुली, अन् विश्वाची
आशा आकांक्षेविन त्यांची
जागेवर आयुष्ये विरती
स्वास्थ्य- सुखातिल खुरटे जगणे
गंजावत गेलेले जीवन !
कळतच नाही अयुष्यावर
कुठले असते हे संमोहन ?
स्थितिप्रियांच्या संथ मनांतहि
कधी अचानक तरंग उठती
आकांक्षांचे पक्षी जागत
वादळ होउन उडू लागती
दिशाबंध लंघून अनोख्या
अवकाशातिल अशी भ्रमंती
अपूर्व जाणिव उत्साहाने
विस्तारत नेते ही दृष्टी
शोधत वाटा नव्या नि द्वारे-
उघडत जाती नित्य नवनवी
जित्या जागत्या तरुणाईला
फुटू लागते नवी पालवी
काळालाही कवेत घेउन
जिणे प्रवाहित ऐसे व्हावे
अभेद्य भेदत, वळसे घेउन
अथांगात त्या विलीन व्हावे
— रचना : सूर्यकान्त द. वैद्य. पुणे
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800
