नाते मनामनाचे

मनात मन हे गुंतत जाते
ते प्रेमाचे नाते असते
वीण असावी साधी सोपी
नको व्हावया गुंता तेथे

नेत्र थकावे वाट पाहुनी
ओढ असावी अंतर्यामी
निःशब्दांची कोमल भाषा
सहज कळावी हृदया-हृदयी

डोळे भरुनी तिला पाहता
नयन तयाचे भारुन जावे
लोचनातले स्वप्नभावही
पापणीवरी दाटुन यावे

सुखदुःखांचे घेउन धागे
वस्त्र विणावे विश्वासाचे
उत्कट, सुंदर भाव प्रितीचे
टिकविल नाते मनामनाचे

— रचना : सुरेश शेठ. कोथरूड, पुणे
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800