मैत्रीची चाहूल

मैत्रीची लागता चाहूल
आठवणींचे दाटे काहूर
मैत्रीची प्रेमळ मिठी
मी आहे ना तुझ्यासाठी

वेळही तेथेच थांबावे
गप्पांचे सूर रंगावे
मनातले ओठांवर यावे
भावनांचे दार उघडावे

मायेने जवळ द्यावे
अश्रूंना वाट मिळावे
अदृश्य घाव दिसावे
प्रेमळ स्पर्शाने पुसावे

हृदयाचे कप्पे जुळावे
गुण दोषांसहित स्वीकारावे
बदलण्याचे प्रयत्न नसावे
आपले अस्तित्व जपावे

हक्काने रुसावे, चिडावे
डोक्यावरून हात फिरावे
अलगद जवळ बसावे
शांतपणे ऐकून घ्यावे

न कोणते हेवे दावे
येथे सुखाचे मेळावे
आनंद द्विगुणित करावे
दुःखही वाटून घ्यावे

अबोल्याचे कारण जाणावे
न सांगता मन वाचावे
भेटीसाठी आतुर असावे
सोबतीचे क्षण जगावे

आनंदाला उधाण यावे
निरागस नाते खुलावे
दिवसेंदिवस बहरत जावे
निर्मळ अंतकरणाने सजावे

मैत्रीचे पारडे जड असावे
अपेक्षांचे ओझे नसावे
आपलेपणाने सावरावे
ओढीने गहिवरून जावे

असे कोणी तरी असावे
जीवाला जीव देणारे
हे श्रीमंतीचे लक्षण खरे
हे श्रीमंतीचे लक्षण खरे.

— रचना : रश्मी हेडे.
— संपादन : देवेंद्र भुजबळ.
— निर्मिती : अलका भुजबळ. ☎️ 9869484800.