तरु तहानले पाऊस पाण्याला,
टप टप बरस पाऊस धारा,
धरती-पर्जन्याची भेट होऊ दे आता,
गंध मातीचा पसरु दे नवा कोरा //१//
बेफाम वावटळ उधाण वाऱ्याला,
मातीचा लोट फिरतो भोवऱ्यापरी,
पक्षी दडाले घरट्यात धुरळा पाहूनि,
दाटले नभी काळे घन रजनीपरी //२//
आला – आला पावसाळा, हिरव्या ऋतूचा,
टपोऱ्या थेंबात चिंब झाली वसुंधरा,
ओहळ धावले घेवूनी लाल मातीला,
मयूर हर्षला पसरूनी पिसारा //३//
तप्त धरती सुखावली गारव्यात,
मंजुळ स्वरात कोकिळेने धरली तान,
फड फड पंखातून उडाले तुषार,
ओघळत्या थेंबात मोहक हिरवेगार पान //४//
अर्थमंत्री तू खरा भारताचा,
दैव परीक्षेत घडतो बळीराजा,
थेंब मूल्यात जपू, राष्ट्रीय ध्यास,
सृष्टीचा करविता, तूच वरुण राजा //५//
रचना : सौ. वर्षा भाबल. नवी मुंबई
संपादन : देवेंद्र भुजबळ.
निर्मिती : अलका भुजबळ. ☎️ 9869484800