सावळा सुंदर दिसतो मुरलीमनोहर
रुप निळे लोंभस दावितो रुक्मिणीवर
वेणुतून विहरती स्वर स्वर्गीय सुस्वर
यमुनेच्या अंगी तरंग मोहक थरथर
त्याची नाजुक बोटे फिरती अलवार
स्वरनाद लपेटे गोकुळी भामावर
पावरीचा नाद घुमे समरसून गोकुळी
गोप गोपिका उभे तल्लीन यमुनाजळी
मस्तकीचे मोरपीस किंचित लवून ऐके
स्वर लय प्राण एक सारेच झाले मुके
नाद गुंजतो गोकुळी तरुवर झाले निःशब्द
कृष्ण स्वर ऐकुनी विश्व अवघे झाले धुंद
– रचना : शिल्पा कुलकर्णी. अमेरिका
– संपादन : देवेंद्र भुजबळ. ☎️ 9869484800