अष्टाक्षरी काव्य रचना
क्षण निवांत सांजेची
होई शांत सांजवेळ
शितलता जीवनात
परिवारा घाली मेळ |१|
निशिकांत सांज होता
भरे चांदण्यांची शाळा
आई घेई मांडीवर
जोजवते तान्ह्या बाळा |२|
अंगणात वृंदावनी
समईच्या दिव्य ज्योती
विजयात तमावर
नभी चमकती मोती |३|
आजी घेई वदवून
रामरक्षा पठणास
स्तोत्र निरांजन घेता
नित्य बसवी ध्यानास |४|
संस्कारांची मांदियाळी
शिकवती आजी आजा
भासे रातराणी गंध
कान्हा वाजवितो बाजा |५|
घरा येई घरपण
नांदे सौख्याचे गोकुळ
पुष्प उधळीत येई
भासे मोहक बकुळ |६|
– रचना : सौ शोभा कोठावदे. नवी मुंबई
– संपादन : देवेंद्र भुजबळ. ☎️ 9869484800