जीवन प्रवास

(मुक्तछंद)

दूरवर चालत आलेय आता..
पण..आजही, मागे वळून पाहताना
दिसतात त्या पाऊलखुणा अनेक
प्रत्येक पावलावर संघर्ष अस्तित्वासाठी

शिक्षणाची अनावर ओढ, अन् पोटतिडकीने केलेली आर्जवे..
कधी पापणीआड दडवलेली स्वप्ने..कधी
कित्तेक त्या रात्री अश्रूंनी भिजलेल्या

गरज फक्त पोटालाच नसते हे मौनानी सांगू पाहणाऱ्या..
दिसतात तेही क्षण, काही आनंदाचे..
दवात भिजल्या कळीसारखे, उमलत जाताना पाकळी पाकळीवर ओला गंध घेऊन डोलणारे..

आस जागवणारे
सुख दुःख, आशानिराशेची वादळे थोपावत,
पावलापावलावर उमटलाय तो,
शब्दांनी बांधलेला, नात्यांना विश्वासाने सांधलेला अन्,
मनापासून जगणं मानलेला
इथवर केलेला प्रवास…

मागे वळून पाहताना.. तृप्तीचे, स्वानंदाचे अलौकिक तेज चेहऱ्यावर विलसणारा,
कधी परिपूर्ण ..तर कधी अपूर्ण.. तरीही सुखावणारा
काहीतरी राहून गेलं तरीही, खूप काहीतरी मिळालंय म्हणून रडता रडता हसवणारा…
जीवन प्रवास……

– रचना : भाग्यश्री खुटाळे. फलटण
– संपादन : देवेंद्र भुजबळ. ☎️ 9869484800