झाली झुंजूमुंजू पहाट,
लक्ष चांदण्या विझल्या नभात,
काजव्यांच्या दिपमाळा मिटल्या रानात,
मंद झाले नक्षत्रांचे दिवे गगनात.
ओघळला बहर प्राजक्ताचा अंगणात,
किलबिलाट भूकेसाठी सुरू घरट्यात,
दंवबिंदूंचे चमकले मोती पानाफुलात
ओली लाल माती पायवाटेत.
फूलांचे फूलोरे फूलले रानावनात,
सुगंधाचा घमघमाट सुटला आसमंतात,
वारा जागा झाला धावे शेताभातात,
डूलते हिरवे जावळ माळरानात.
हंबरती वासरे पहा गोठ्यात,
तूर्रेदार कोंबडा आरवे जोमात,
आता पळभरात फूटेल तांबडे नभात,
पूर्वा सजेल लाल गुलाबी रंगात.
रवीची किरणे येतील धावत,
सुवर्णरथ येईल सोने सांडत,
कलली पहाट झाली सुप्रभात,
नव्या दिनी नव्या आशा फुलवत.
— रचना : अनुराधा जोशी.
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800