पैसा धन खोटे

स्वार्थाचा करुनी त्याग,
साक्षरता धन व्हावे !
घडुनी शिक्षित पिढी,
सुखाचे गोडवे गावे !!

कष्टकरी जनतेला,
कष्टाचे मोल द्यावे !
राबणारे हात सारे,
सुखी हसरे दिसावे !!

ईमान ठेऊ मातीशी,
करुया मळे हिरवे !
बळीस सुख मिळण्या,
राहु शेतकऱ्या सवे !!

मातीचा मानव देह,
अंती मातीत वसावे !
जपुया शब्दांचे धन,
गोड शब्दच बोलावे !!

माय बाप भाऊ सारे,
बहिणीस प्रेम द्यावे !
माणुसकी नाते सारे,
मानव मना रुजावे !!

नको फुकटचा पैसा,
कष्ट सार्थकी लागावे !
राबत्या बळीराजाचे,
माय बाप तुम्ही व्हावे !!

पैशाची नसावी उर्मी,
धन दान धर्म द्यावे !
भुकेल्या देऊनी अन्न,
सुख वाटीत फिरावे !!

सुख कष्टाने मिळते,
कष्ट करीत राहावे !
स्वच्छ संकल्प घेऊनी,
कर्तृत्व सिद्धीस न्यावे !!

– रचना : जी. पी. खैरनार. नाशिक