महाराष्ट्र राज्यातील गरीब, गरजू रुग्णांना त्यांच्या दुर्धर आजारावर तातडीने उपचार होण्यासाठी मुख्यमंत्री वैद्यकीय सहाय्यता निधी व धर्मादाय रुग्णालय मदत कक्ष सुरू करणाऱ्या मुख्यमंत्री देवेंद्र फडणवीस यांचा आज वाढदिवस आहे. त्यानिमित्ताने जाणून घेऊया, या निधीतून कशी, किती, कशासाठी मदत मिळते ते. मुख्यमंत्री देवेंद्र फडणवीस यांना न्यूज स्टोरी टुडे परिवारातर्फे वाढदिवसाच्या मनःपूर्वक शुभेच्छा.
— संपादक
दुर्धर आणि महागड्या शस्त्रक्रियांसाठी राज्यातील गोरगरीब, गरजू रुग्णांना थेट आर्थिक मदत देण्यासाठी मुख्यमंत्री देवेंद्र फडणवीस यांच्या मार्गदर्शनाखाली सुरू करण्यात आलेला मुख्यमंत्री वैद्यकीय सहाय्यता निधी व धर्मदाय रुग्णालय मदत कक्ष वरदान ठरला आहे.
जिल्हास्तरावर मदत कक्ष :
या निधीतून सहाय्य मिळावी यासाठी रुग्णांच्या नातेवाईकांना अर्ज सादर करण्यासाठी पूर्वी मुंबई येथे यावे लागत असे. त्यात मौल्यवान वेळ वाया जात असे. अन्यही बऱ्याच अडचणीही येत.या सर्व बाबी विचारात घेऊन संबंधित रुग्णांना त्यांच्या जिल्ह्यातच अर्थसहाय्य उपलब्ध होण्यासाठी मुख्यमंत्र्यांच्या संकल्पनेतून प्रत्येक जिल्हाधिकारी कार्यालयात मदत कक्ष सुरु करण्यात आला आहे. गरजूंना तसेच सामान्य जनतेला तत्काळ मार्गदर्शन व मदत मिळण्यासाठी तिथे नोडल अधिकारी म्हणून एक डॉक्टरही असतो. मदत कक्षात आलेला एकही रुग्ण मदतीविना वंचित राहू नये, या तत्त्वावर कक्षाचे काम सुरू असते.
पात्रतेसाठी निकष :
या उपक्रमाचा लाभ घेण्याकरिता अर्जदार रुग्ण हा महाराष्ट्राचा रहिवासी असावा लागतो. त्याचे वार्षिक कौटुंबिक उत्पन्न 1.60 लाखांच्या आत असणे आवश्यक आहे. त्याच्याकडे रेशन कार्ड व आधार कार्ड असणेही गरजेचे आहे. उपचार घेत असलेले रूग्णालय महाराष्ट्र राज्यामधील असणे आवश्यक असून त्याची नोंद मुख्यमंत्री वैद्यकीय सहाय्यता निधीच्या प्रणालीमध्ये असणे आवश्यक असते.
मदतीस पात्र आजार :
या महत्वाकांक्षी उपक्रमांतर्गत काही ठराविक आजार चिन्हीत करण्यात आले आहे. यामध्ये कॉकलियर ईम्प्लांट/अंतस्त कर्णरोपण शस्त्रक्रिया (वय 2 ते 6 वर्षांपर्यंत), ह्रदय/यकृत/किडणी/फुप्फुस/बोन मॅरो आणि हाताचे प्रत्यारोपण, कर्करोग/रस्ते अपघात/लहान बालकांची शस्त्रक्रिया/मेंदुरोग/ ह्रदयरोग आणि हिप रिप्लेसमेंट सर्जरी यासह डायलिसिस/केमोथेरेपी/रेडिएशन/नवजात शिशुंचे आजार/गुडघ्याचे प्रत्यारोपण/भाजलेले रूग्ण/अस्थीबंधन आणि विद्युत अपघात आदी आजारांचा समावेश होतो.
आवश्यक कागदपत्रे :
वैद्यकीय सहाय्यता मदत कक्षाकडून अर्थसहाय्य प्राप्त करण्याकरिता विहित नमुन्यातील अर्ज, वैद्यकीय खर्चाच्या अंदाजपत्रकाची मूळप्रत, डॉक्टरांच्या सही व शिक्यासह ( रुग्णालय खाजगी असल्यास जिल्हा शल्यचिकित्सक यांचेकडून प्रमाणित करणे आवश्यक). तहसिलदार कार्यालयाचा उत्पन्नाचा दाखला (रु. 1 लाख 60 हजार पेक्षा कमी), रुग्णाचे आधार कार्ड (महाराष्ट्र राज्याचे)/नवजात बाळासाठी आईचे आधारकार्ड आवश्यक आहे, रुग्णाचे रेशन कार्ड (महाराष्ट्र राज्याचे), संबधीत आजाराचे रिपोर्ट (ईन्व्हेस्टिगेशन रिपोर्टस) असणे आवश्यक, रुग्णाचा पासपोर्ट फोटो, अवयव प्रत्यारोपण रुग्णांसाठी झेडटीसीसी/शासकीय समितीची मान्यता आवश्यक आहे, रस्ते अपघात असल्यास एफआयआरची प्रत जोडणे आवश्यक आहे.
अर्ज करण्याची पद्धत :
या उपक्रमांतर्गत मदत मिळण्यासाठी विहीत नमुन्यात मुळ अर्ज, सर्व आवश्यक कागदपत्रांसह संबंधित जिल्ह्याच्या मुख्यमंत्री वैद्यकीय सहाय्यता निधी कक्षाकडे सादर करणे आवश्यक आहे. अर्जाचा नमुना https://cmrf.maharashtra.gov.in या संकेतस्थळावर उपलब्ध आहे.
रूग्णालयासाठी अटी :
या उपक्रमाचा लाभ घेण्यासाठी संबंधित रुग्णालय हे नोंदणीकृत असणे गरजेचे असून त्या रूग्णालयाची नोंद मुख्यमंत्री वैद्यकीय सहाय्यता निधीच्या प्रणालीमध्ये असणे आवश्यक आहे.
रूग्णालयामध्ये महात्मा ज्योतीराव फुले जन आरोग्य योजना/आयुष्यमान भारत योजना/धर्मदाय रूग्णालय/आरबीएसके इत्यादी योजना कार्यान्वीत असल्यास या योजनांमधून रूग्णाचा उपचार होणे बंधनकारक आहे. रूग्णाचा आजार या योजनेमध्ये बसत नसल्यास तसे प्रमाणपत्र खर्चाच्या अंदाजपत्रकासोबत जोडणे आवश्यक आहे. तसेच रुग्णाला सोडण्यापूर्वी अर्ज सादर करणे आवश्यक आहे.
मदतीचे स्वरूप :
रूग्णाच्या आजाराचे व उपचाराचे स्वरूप, इन्व्हेस्टीगेशन रिपोर्ट याचे अवलोकन करून कार्यकारिणी समिती नियमाप्रमाणे निर्णय घेत जास्तीत जास्त 2 लाखांचे अर्थसहाय्य ह्रदय/यकृत/किडणी/फुप्फुस आणि बोन मॅरो प्रत्यारोपणाकरिता करण्यात येते. गरजू व गरीब नागरिकांना गंभीर, दुर्धर आजाराच्यावेळी मुख्यमंत्री वैद्यकीय सहाय्यता निधी कक्षाव्दारे देण्यात येणारी मदत बहुमोलाची ठरत आहे. मुख्यमंत्री वैद्यकीय सहाय्यता निधी व धर्मादाय रुग्णालय मदत कक्षाकडून गरजू रुग्णांना वेळेत मदत मिळावी, यासाठी राज्यातील सर्व मुख्यमंत्री वैद्यकीय सहाय्यता कक्ष प्रयत्नशील असतात, अशी माहिती मुंबई मंत्रालय येथील राज्यातील सर्व सहाय्यता कक्षाचे समन्वयक रामेश्वर नाईक यांनी दिली.
अमरावती विभाग :
राज्यभर या निधीचा किती फायदा होत आहे, याचे उदाहरण म्हणून अमरावती विभागाची कामगिरी बघणे उचित ठरेल.
या विभागातील पाचही जिल्ह्यात मिळून जानेवारी ते जून 2025 या कालावधीत 6 कोटी 82 लाख 91 हजार रुपयांची मदत देण्यात आली आहे. मदत देण्यात आलेल्या रुग्णांची संख्या आणि त्यांना देण्यात आलेले अर्थ सहाय्य याची जिल्हानिहाय माहिती पुढील प्रमाणे आहे.
अमरावती : 173 रुग्ण.
1 कोटी 69 लाख 15 हजार रुपये.
अकोला : 40 रुग्ण.
30 लाख 30 हजार रुपये .
यवतमाळ : 86 रुग्ण.
79 लाख 82 हजार रुपये .
बुलडाणा : 348 रुग्ण .
2 कोटी 89 लाख 4 हजार रुपये .
वाशिम : 116 रुग्ण.
1 कोटी 14 लाख 60 हजार रुपये.
या कक्षाद्वारे अनेक गरजू रुग्णांना दिलासा मिळाला असून अधिकाधिक गरजूंपर्यंत लाभ पोहचावे यासाठी मुख्यमंत्री कार्यालयही या उपक्रमाची प्रभावी अंमलबजावणी करीत आहे.
आपल्या कठीण समयी हा कक्ष पाठीशी भक्कमपणे उभा रहात असल्याने संबंधित रुग्ण आणि त्यांचे नातेवाईक यांच्या चेहऱ्यावर समाधान दिसून येते, हीच या कक्षाला मिळालेली मोठी पावती आहे.
— लेखन : विजय राऊत. सहायक संचालक (माहिती),
विभागीय माहिती कार्यालय, अमरावती.
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800