कोणे एकेकाळी साध्या टेलिफोन वर बोलणं, कठीण असायचं. टेलिफोन ही श्रीमंतांची मक्तेदारी होती. आज मात्र सर्व सामान्य व्यक्तीच्या हातातही मोबाईल दिसतोय, इतकी परिस्थिती बदलली आहे.
अर्थातच हा बदल स्वागतार्ह असला तरी मोबाईल वापरताना काही गोष्टी आपण लक्षात ठेवणंही आवश्यक असते. ही बाब लक्षात घेऊन महाराष्ट्र शासनाने नुकतेच शासकीय अधिकारी, कर्मचारी यांच्यासाठी एक परिपत्रक जारी केले आहे.
पाहू या, काय आहे या परिपत्रकात !
“परिपत्रक”
अलिकडील काळात सुलभ व वेगवान संपर्क माध्यम म्हणून शासकीय कामकाजाबाबत भ्रमणध्वनीचा (Mobile/Cell Phone) वापर अपरिहार्य बनला आहे.
तथापि असे निदर्शनास आले आहे की, भ्रमणध्वनीच्या वापराबाबत काही वेळा संबंधित अधिकारी /कर्मचारी यांचेकडून अपेक्षित शिष्टाचार पाळण्यात येत नाहीत. अशा प्रकारच्या वर्तणुकीमुळे शासनाची प्रतिमा काही प्रमाणात मलीन होते. सबब शासकीय कामकाज करताना भ्रमणध्वनीच्या वापराबाबत पाळावयाच्या शिष्टाचाराबाबत खालीलप्रमाणे सूचना देण्यात येत आहेत.
1. कार्यालयीन कामासाठी दूरध्वनीचा वापर करताना प्राथम्याने कार्यालयातील दूरध्वनीचा ( Landline) वापर करावा.
2. कार्यालयीन वेळेत कार्यालयीन कामासाठी आवश्यक असेल तेव्हाच भ्रमणध्वनीचा वापर करावा.
3. भ्रमणध्वणीवर बोलताना सौजन्यपूर्ण भाषेचा वापर करावा. तसेच बोलतांना इतरांच्या उपस्थितीची जाणीव ठेवावी.
4. भ्रमणध्वणीवर बोलताना सौम्य आवाजात बोलावे,बोलताना वाद घालू नये तसेच असंसदीय भाषेचा वापर करु नये.
5. कार्यालयीन कामासाठी भ्रमणध्वनीचा वापर करताना लघु संदेशाचा (Text Message) शक्यतो वापर करावा. तसेच मोबाईल फोनवर बोलताना कमीत कमी वेळेत संवाद साधावा.
6. भ्रमणध्वणी व्यस्त असताना प्राप्त लोक प्रतिनिधी /वरिष्ठ अधिकाऱ्यांच्या कार्यालयीन काॅल्सना तात्काळ उत्तर द्यावे.
7. भ्रमणध्वनीवर कार्यालयीन कामकाजासाठी समाज माध्यमांचा वापर करताना वेळेचे व भाषेचे तारतम्य बाळगावे.
8. अत्यावश्यक वैयक्तिक दूरध्वनी, कक्षाच्या बाहेर जाऊन घ्यावेत.
9. वरिष्ठ अधिकाऱ्यांच्या कक्षात / बैठकीदरम्यान असताना आपला भ्रमणध्वनी silent /vibrate mode वर ठेवावा.
10. वरिष्ठ अधिकाऱ्यांच्या कक्षात /बैठकी दरम्यान भ्रमणध्वनी तपासणे/ संदेश तपासणे, ear piece /ear phone वापरणे अशा बाबी टाळाव्यात.
11. कार्यालयीन कामकाजासाठी दौऱ्यावर असताना भ्रमणध्वनी बंद ठेवण्यात येऊ नये.
हे परिपत्रक हे महाराष्ट्र शासनाच्या www.maharashtra.gov.in या संकेतस्थळावर उपलब्ध करण्यात आले असून त्याचा संगणक संकेतांक क्र. 202107231923384507 असा आहे.
– टीम एनएसटी 9869484800.
