स्वर्गीय ‘वृक्षमित्र’ आबासाहेब मोरे यांनी स्थापन केलेल्या निसर्ग व सामाजिक पर्यावरण प्रदूषण निवारण मंडळ तसेच महाराष्ट्र प्रदूषण नियंत्रण मंडळातर्फे पाचवे पर्यावरण संमेलन राळेगणसिद्धी येथे ज्येष्ठ सामाजिक कार्यकर्ते पद्मभूषण अण्णा हजारे यांच्या अध्यक्षतेखाली २५ व २६ डिसेंबर २०२१ रोजी संपन्न होत आहे. मंडळाची यापूर्वीची संमेलने राळेगण-सिद्धी सह चिपळून आणि भूतानला झालेली आहेत.
पहिल्या दिवशी सकाळी १० वाजता संमेलनाध्यक्ष पद्मभूषण अण्णा हजारे यांच्या उपस्थितीत श्री. साईबाबा संस्थान ट्रस्टच्या मुख्य कार्यकारी अधिकारी भाग्यश्री बानाईत धिवरे, आय ए एस यांच्या हस्ते संमेलनाचे उद्घाटन होईल.
उद्घाटन कार्यक्रमात पर्यावरण मंडळाच्या वेबसाईटचे उद्घाटन होईल. या वेबसाईटची निर्मिती चिपळूणचे वेब डिझायनर अँड डेव्हलपर कुंदन श्येटे यांनी केलेली आहे. वेबसाईटचे संपादन मंडळाचे सचिव धीरज वाटेकर यांनी केले आहे.
दुपारच्या भोजनानंतर २.०० ते ३.०० वाजेपर्यंत वरिष्ठ भूजल वैज्ञानिक उपेंद्र धोंडे यांचे ‘पाणी व जल व्यवस्थापन’, ३.०० ते ४.०० वाजेपर्यंत, प्राचार्य डॉक्टर के.सी. मोहिते यांचे ‘सौरऊर्जा व्यवस्थापन’, सायंकाळी ४.१५ ते ५.१५ पर्यंत, स्वच्छ भारत मिशनच्या प्रभाकर तावरे यांचे ‘प्लास्टिक निर्मूलन आणि घनकचरा व्यवस्थापन’ सायंकाळी ५.१५ ते ५.४५ वाजेपर्यंत, पक्षीमित्र अनिल माळी यांचे ‘महाराष्ट्रातील पक्षी विविधता आणि अधिवास संवर्धन’, ५.४५ ते ७.०० वाजेपर्यंत, पर्यावरण कार्यकर्त्यांचे अनुभवकथन, ७.०० ते ७.३० वाजेपर्यंत, अमेरिकेतील पर्यावरण अभ्यासक संगीता तोडमल यांचे ऑनलाईन पद्धतीने ‘पर्यावरणाचे वेगळेपण’, रात्री भोजनानंतर ८.३० ते ९.३०, विलास हासबे यांचा ‘हा खेळ बाहुल्यांचा’ असे कार्यक्रम होतील.
संमेलनाच्या दुसऱ्या दिवशी सकाळी चहापानानंतर ८ ते १०.४५ वाजेपर्यंत, राळेगणसिद्धी क्षेत्रभेट संपन्न होईल. ११ ते १२.३० अण्णा हजारे यांच्यासोबत संमेलन प्रतिनिधींचे विचारमंथन होईल. दुपारी १२.३० ते १.०० वाजेपर्यंत, जगात कोठेही उपलब्ध नसलेल्या पारंपारिक बियाणांच्या वाणांच्या संरक्षक, संवर्धक बीजमाता पद्मश्री राहीबाई पोपेरे यांचे ‘देशी बियाणे बँक’ या विषयावर मार्गदर्शन असेल. दुपारच्या भोजनानंतर २.०० ते ४.०० वाजेपर्यंत, संमेलनाध्यक्ष अण्णा हजारे यांच्या प्रमुख उपस्थितीत समारोप समारंभ होईल.
या संमेलनाला येताना कोरोनाचे दोन्ही डोस पूर्ण झालेले आवश्यक आहे. मर्यादित प्रवेश असल्याने संमेलनाला येऊ इच्छिणाऱ्या प्रतिनिधींनी आपली नाव नोंदणी करावी, असे आवाहन मंडळाचे अध्यक्ष प्रमोद मोरे, सचिव वनश्री मोरे, पर्यावरण महिला सखी मंचच्या अध्यक्षा प्रियवंदा तांबोटकर, पर्यावरण महिला सखी मंच पुणे जिल्हा प्रसिद्धी प्रमुख माधुरी काकडे यांनी केले आहे.
अधिक माहितीसाठी राज्य कार्याध्यक्ष, प्रमोद काकडे यांच्याशी ९०२८०९५३३२ या मोबाईल क्रमांकावर संपर्क साधावा.
– देवेंद्र भुजबळ. 9869484800
