लावणी : पहिला पाऊस

अहो दिलबरा, ऐका की जरा…हौस माझी पुरवा
पहिल्या पावसात संगतीने लोणावळा फिरवा //धृ//

कडकड हा उन्हाळा
अंगाची झाली काहिली
धडधड ह्या उरात
वाट तुमची पाहिली
भरजरी आता हो राया, शालू आणा मला हिरवा
पहिल्या पावसात संगतीने लोणावळा फिरवा //१//

टपटप हा पाऊस
मन धुंद फुंद झालं
गरगर ही गिरकी
अंगात वारं शिरलं
माझ्या काळ्याभोर केसात माळा तुम्ही आज मारवा
पहिल्या पावसात संगतीने लोणावळा फिरवा //२//

हुडहुडी ही भरली
हळूच घ्या जवळी
तडफड या जीवाची
अजून ना शमली
आता माझ्यासाठी तुम्हीच प्रेमाचा धडा हा गिरवा
पहिल्या पावसात संगतीने लोणावळा फिरवा //३//

– रचना : शिल्पा सकळकळे. गुरुग्राम, हरियाणा
– संपादन : देवेंद्र भुजबळ. ☎️ 9869484800