विजयाताई : आधुनिक सरस्वती

मराठी साहित्य विश्वात अत्यन्त आदराने, प्रेमाने घेतले जाणारे नाव म्हणजे डॉ विजयाताई वाड होत. त्यांचा आज वाढदिवस आहे. त्यानिमित्ताने त्यांच्या एका सखीने केलेले हे हितगुज प्रातिनिधिक आहे…..

“माझी मराठी बोली कौतुके” म्हणून श्री संत ज्ञानेश्वर महाराजांनी लावलेला हा मराठी भाषेचा वेलू आज बहू विस्तार होत गगनावरी गेला आहे.
यासाठी प्राचीन संत, पंत आणि शाहीरांनी जेवढी ही वेल समृद्ध केली, वाढवली, तेवढीच अर्वाचीन साहित्यिकांनी ती बहराला आणली. कथा, कविता, कादंबरी, नाटक, चरित्र, आत्मचरित्र, ललित सोबत सर्वांगानी तिला खतपाणी घालून असंख्य नामवंत साहित्यिक रत्नांनी विस्तारित केले आहे..

तोच वारसा पुढे चालवण्यासाठी आज असंख्य नामवंत साहित्यिकांनी ही साहित्यसेवा अविरत ठेऊन या वेलीचे वटवृक्षात रूपांतर केले आहे. त्यातील एक महत्वाचे नामवंत नाव म्हणजे डाॅ.विजयाताई वाड.

साहित्य क्षेत्रात अतिशय आदर, आपुलकी, प्रेम आणि सन्मान मिळवलेल्या विजयाताईंनी आज वयाची ७६ वर्षे पूर्ण केली पण त्यांच्या वयाच्या दुपटीपेक्षा जास्त साहित्य निर्माण करण्याचे अनमोल कार्य केले आहे. म्हणूनच या आधुनिक सरस्वतीचे साहित्यिक योगदान फार मोलाचे आहे.

कथा, कविता, कादंबरी, नाटक, चरित्र ललित वाङमया बरोबरच बालसाहित्य, कुमार साहित्याची विपुल निर्मिती त्यांनी केली. आकाशवाणी, दूरदर्शनसाठी मालिका लेखन केले. विश्वकोशाच्या निर्मितीचे फार मोलाचे कार्यही त्यांनी केले.

शैक्षणिक सामाजिक सांस्कृतिक साहित्यिक क्षेत्रात मोलाची भर घालणारी ही सरस्वती असंख्य दिग्गजांच्या हस्ते अनेक श्रेष्ठ पुरस्काराने सन्मानित झाली आहे. इतकी प्रसिद्धी मिळवूनही त्यांच्याइतकी विनम्रता मी कुठे अनुभवली नाहीं. अत्यंत मधुर वाणी आणि प्रेमळ, लोभस, सालस, विनम्र व्यक्तीमत्व असणारी ही शारदा आमची “आई” आहे.
तिच्या दर्शनाने मनाला सुखशांती मिळते. तिच्या प्रेमळ स्पर्शाने उर्जा निर्माण होते.

मराठी भाषेला अभिजात भाषेचा दर्जा मिळावा म्हणून कित्येक वर्षे कार्य करणा-या तसेच या कामाचा पाठपुरावा करण्यासाठी तळमळीने पंतप्रधान मोदीजींना लाखो पत्र पाठवण्याची प्रेरणा देणारी ही सरस्वती आज ७७ वर्षात पदार्पण करीत आहे.

अजूनही त्यांची लेखनसेवा तेवढ्याच वेगाने, जिद्दीने चालू आहे.
एकाच वेळी दहा प्रकाशकाकडून १११ बालपुस्तिका प्रकाशित करण्याचे मौलिक कार्य या वर्षी त्यांनी करून घेतले आहे.

आपल्या आईचेच कार्य आणि तिचा समर्थ वारसा पुढे चालवणारी डाॅ.निशिगंधा वाड ही सर्व गुणसंपन्न अभिनेत्री त्यांचे गौरवास्पद कन्यारत्न होय.

मराठी साहित्य आणि कलाक्षेत्रात या दोघींचे कार्य अनमोल आहे. आम्हाला त्यांचा अभिमान आहे‌. विजयाताई आमच्या “आम्ही सिद्ध लेखिका” संस्थेच्या ज्येष्ठ सल्लागार समितीवर आहेत याचा आम्हाला अभिमान वाटतो

डाॅ.विजयाताईंचा आज वाढदिवस…त्यांना प्रदीर्घ, संपन्न आयु आरोग्य आनंद आणि साहित्य निर्मितीचे अखंड समाधान मिळो ही ईश्वरचरणी प्रार्थना 🙏

लाभो यश किर्ती सुख शांती
आयु आरोग्य आणि समृद्धी
या सा-या सदिच्छांना
घेऊन आले मी सांगाती !
आजच्या दिनी हीच भेट
अर्पण करते तुम्हाप्रति
स्विकारावी ती तुम्ही
ही माझी नम्र विनंती.

– लेखन : प्रा.पद्मा हुशिंग.
अध्यक्ष, आम्ही सिद्ध लेखिका ठाणे.
– संपादन : देवेंद्र भुजबळ. 9869484800