अलका भुजबळ : माणुसकी सेवा गौरव पुरस्कार प्रदान.

न्यूज स्टोरी टुडे, www.newsstorytoday.com या वेबपोर्टलच्या निर्मात्या म्हणून या पोर्टलच्या माध्यमातून सतत समाजाच्या प्रगतीसाठी कार्यरत असल्याबद्दल, कॅन्सर ग्रस्त आणि त्यांच्या कुटुंबीयांना धीर, दिलासा देण्यासाठी तत्पर असलेल्या सौ अलका भुजबळ यांना भारत सरकार नोंदणीकृत माणुसकी सेवा फाउंडेशनच्यावतीने नुकताच माणुसकी सेवा गौरव पुरस्काराने नाशिक येथे गौरविण्यात आले.

अभिनेत्री पल्लवी यांच्या हस्ते हा पुरस्कार प्रदान करण्यात आला. यावेळी माजी मंत्री बबनराव घोलप, माजी आमदार डॉ सुधीर तांबे, माणुसकी सेवा फाउंडेशनचे अध्यक्ष दादाभाऊ केदारे, सल्लागार अशोक कुंदप आदी मान्यवर उपस्थित होते.

या वेळी सर्व मान्यवर मंडळींनी समयोचीत भाषणे केली. कार्यक्रमाला महाराष्ट्राच्या विविध भागातून आलेले लोक मोठ्या संख्येने उपस्थित होते.

अल्प परिचय
‘न्यूज स्टोरी टुडे’ या आंतरराष्ट्रीय वेबपोर्टल च्या निर्मात्या म्हणून सौ अलका भुजबळ सुपरिचित आहेत. आज हे वेबपोर्टल ८६ देशात पोहोचले असून ४ लाख ७६ हजार इतके त्याचे व्ह्यूज आहेत. या वेबपोर्टल ला आता पर्यंत चौथा स्तंभ, एकता पुरस्कार, सावित्रीबाई फुले पुरस्कार प्राप्त झाले आहेत.

कॅन्सर वर यशस्वी मात केलेल्या सौ अलका भुजबळ महिलांमध्ये कॅन्सर विषयक जन जागृती व्हावी, यासाठी सतत कार्यशील आहेत. कॅन्सर च्या स्वानुभवावरून लिहिलेले त्यांचे “कॉमा” पुस्तक प्रसिध्द डिंपल पब्लिकेशन ने प्रकाशित केले आहे. याच पुस्तकावर आधारित, “कॉमा” ही डॉक्युमेंटरी तत्कालीन राज्यपाल भगतसिंग कोश्यारी यांच्याहस्ते राजभवन मध्ये विमोचीत करण्यात आली आहे.

सौ अलका भुजबळ या आरोग्य, सांस्कृतिक, सामाजिक कार्यात सतत सक्रिय असतात. त्यांनी दामिनी, बंदिनी, पोलिसातील माणूस, महाश्वेता, हे बंध रेश्माचे, आई अशा विविध लोकप्रिय दूरदर्शन मालिकांमध्ये विविध भूमिका साकारल्या आहेत.
त्यांना आता पर्यंत विविध पुरस्काराने गौरवण्यात आले आहे.

विविध विषयांवर त्यांचे लिखाण चालू असते तसेच, ‘जीवन प्रवास’ या पुस्तकाच्या प्रकाशनाने त्यांनी आता पुस्तक प्रकाशनाच्या व्यवसायात प्रवेश केला आहे.

– टीम एनएसटी. 9869484800.