ओलांडता उंबरठा
दिसे जग बाहेरचे
तिथे नसे कोणी नाते
नाही कोणीही हृदयाचे //१//
घरा बाहेर असतो
उंबरठा उभारला
नाती दृढ करण्याचे
आवाहन करायला //२//
साऱ्या घराचे अस्तित्व
उंबरठा ठेवतसे
अबाधित व्यवस्थित
लक्ष्मी वास करतसे //३//
सडा सारवण करु
पुजू या उंबरठ्यास
जपू संस्कृती आपली
करु नये दुरापास्त //४//
लक्ष्मणरेषाच जणू
असतो हा उंबरठा
जग कळे बाहेरचे
ओलांडता उंबरठा //५//
दुःख क्रोध सांभाळून
घेत असणारे व्यक्ती
असे उंबरठया आत
जसे त्यांची ही नियुक्ती //६//
उंबरठा देत आहे
आपणास ही जाणीव
मर्यादाची संस्कृतीची
नाही कसली उणीव //७//
उंबरठ्याच्या बाहेर
कधीही पाडूच नये
वाकडे पाऊल कोणी
धुळीस मिळू नये //८//
सारथीच बनलेला
उंबरठाच असतो
वास्तुरुपी या घराचा
स्वच्छंद आनंद देतो //९//
— रचना : परवीन कौसर. बंगलोर
— संपादन : देवेंद्र भुजबळ. ☎️ 9869484800