जागतिक काव्यदिन
जगाला एकापेक्षा एक मौल्यवान, अजरामर काव्य कलाकृती प्रदान करणाऱ्या सर्व कवींना गौरवण्याचा आजचा दिवस आहे.या निमित्ताने सर्व कवी, कवयित्रीना हार्दिक शुभेच्छा.
— संपादक
युनेस्कोने पॅरिस परिषदेत २१ मार्च १९९९ रोजी जागतिक काव्य दिनाची घोषणा केली. तेव्हा पासून दरवर्षी २१ मार्च हा दिवस जागतिक काव्यदिन म्हणून साजरा करण्यात येतो.
युनेस्कोच्या महासचिवांनी तेव्हा म्हटले होते, “कविता हा एक झरोका असून त्याद्वारे मानवतेतील वैविध्य मनमोकळा श्वास घेऊ शकते.”एकोणिसाव्या शतकातील फ्रेन्च कलावंत जोसेफ राँऊ ह्यानी म्हटले होते की, Science is for them who learn, Poetry is for those who know. हे खरेच आहे की बुद्धीची कसोटी लावून विज्ञान शिकता येते पण पद्य मनाला भावणे गरजेचे असते.
सुप्रसिद्ध कवयित्री संजीवनी मराठे ह्यांनी कवितेच्या उगमाची प्रक्रियाच त्यांच्या पुढील कवितेतून समोर आणली आहे.
“कुंभ रसांचे शिरी घेऊनी शब्दांच्या गवळणी
नजरेपुढती ठुमकत येती रूपवती कामिनी
त्यांच्या नादे करू पाहते पदन्यास मी कशी
मी न कुणाला सांगायची कविता स्फुरते कशी”
कविता तिच्या नाजूक नखरेलपणामुळे आणि भाव तरलतेमुळे स्त्रीलिंगी मानली जाते. स्त्रियांच्या नकारात अनेकदा होकार दडलेला असतो, असं मानलं जातं. विलियम वर्ड्सवर्थ ह्यांनी म्हटल्याप्रमाणे “Poetry is the spontaneous overflow of powerful feelings”. शब्दांच्या माध्यमातून होणारा रसरशीत भावनांचा उस्फुर्त उद्रेक म्हणजे कविता.
युनेस्को प्रत्येक वर्ष एका महान कवीला समर्पित करते. त्याप्रमाणे यंदाचे वर्ष जॉर्जिया देशातील तब्लिसी येथील कवी निकोलस बाजातशविली (१८१७-१८४४) यांना समर्पित करण्यात आले आहे. त्यांनी ३२ पेक्षा अधिक काव्यरचना केल्या. त्यात बहुतांश प्रेमकविता आहेत.
काव्य दिनाच्या सर्व कवी, कवयित्री आणि काव्यप्रेमीना हार्दिक शुभेच्छा.
— संकलन : संजीव वेलणकर. पुणे
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800
अप्रतिम