Thursday, May 30, 2024
Homeसाहित्यनिसर्गाची कला

निसर्गाची कला

आळस झटकून निसर्ग उठला
हाती होता रंगांचा कुंचला
इकडे तिकडे कागद शोधत
मनांत चित्र रंगवू लागला

आभाळाने झटकन् केली
त्याच्यापुढे कोरी पाटी
कुंचला फिरु लागला आणि
करू लागला रंगरंगोटी

मनामधले रंग आता
उमटू लागले कागदावर
तोच अचानक काळ्या ढगाने
लक्ष वेधले स्वतःवर

त्याच्याच पोटात टोचून त्याने
धुवून घेतली पाटी छान
सारे मनासारखे जमताच
हसून हलवली आपुली मान

एकएक करून रंग आता
उतरू लागले झराझर
कुंचल्यामधून सांडू लागले
थेंबाथेंबाने पृथ्वीवर

उघड्या, बोडक्या झाडांवरती
आला सुरेख लालसर रंग
नवथर पोपटी रंगाचा
पानांना घडू लागला संग

डोंगरांनाही जाग आली
सजले घालून हिरवा कोट
शुभ्र नाच-या वेल्हाळांनी
हळूच धरले त्यांचे बोट

निळी, जांभळी, पिवळी,पांढरी
रानफुलेही लागली सजूं
काळ्या काळ्या धरतीवरती
रांगोळ्याही लागल्या नाचूं

नाचत, लाजत फुलपाखरांनी
मागून घेतले भरपूर रंग
खुशीत येऊन निसर्गाने
रंगवून टाकले त्यांचे अंग

पाखरांनीही किलबिल करीत
साधून घेतले अपुले काम
पंख पसरून भरारी घेत
कलाकाराचा राखला मान

मुक्तपणे उधळून टाकले
पोतडीतले सारे रंग
चराचराला करून सुंदर
रंगामध्येच झाला दंग

स्वाती दामले

— रचना : स्वाती दामले
— संपादन : देवेंद्र भुजबळ. ☎️ 9869484800

RELATED ARTICLES

LEAVE A REPLY

Please enter your comment!
Please enter your name here

- Advertisment -

Most Popular

- Advertisment -
- Advertisment -
- Advertisment -

Recent Comments