Sunday, April 21, 2024

मीलन

रात्र संपली पहाट फुलली
क्षितिजी त्या मग फुटे तांबडी
फेकून दुलई अंधाराची
सकाळ हासरी नाचत आली

नवतरुणी परी अवगुंठीत ही
ओढी ओढणी फिक्या धुक्याची
अवचित वारा झुळझुळ वाहे
ओढणीस त्या उडवू पाहे

खट्याळ्यास त्या दाद न देई
घट्ट धुक्यासि लगटूनि घेई
मधु गुंजारव किलबिल कानी
उषा लाजली निबिड विपिनी

सकाळ आठवे रूप तयाचे
स्वप्नी पाहिल्या राजसख्याचे
कधी भेटशील मला सजण तूं
अवगुंठण हे दूर करी तूं

आणि पावला मदन तियेला
गगनी उगवला सायंतारा
खजिल,अधीर ती होई बावरी
सुप्रभाती शशी काय हा करी?

दाट धुक्याने केली गंमत
झाकूनी टाकी तोचि भास्कर
यास्तव दिनकर भासे शशीधर
कशी ग केली गम्माडी गंमत

क्षणात तेजोनिधी स्वबळे
उडवुनी लावी पडदे सगळे
अवगुंठन ते दूर सारीले
सोनसळी गळी रविकर पडले

दोन मनांचे मीलन झाले
प्रभातीस मग तेज मिळाले
धुके बिचारे फजित पावले
जग सारे अभिनंदन वदले

स्वाती दामले

— रचना : स्वाती दामले.
— संपादन : देवेंद्र भुजबळ. ☎️ 9869484800

RELATED ARTICLES

2 COMMENTS

LEAVE A REPLY

Please enter your comment!
Please enter your name here

- Advertisment -

Most Popular

- Advertisment -
- Advertisment -
- Advertisment -

Recent Comments