युगानुयुगाचे नाते आपुले
बालपणी चांदोबात दंग
लिंबोणीच्या झाडामागे तुझे लपणे
स्वप्नाची वाट जाई चंदाराणी संग ||१||
तुपरोटीत पडता माशी
तू जात असे उपाशी
बहिणी ओवाळती तुज
गणपती पडताच हसलासी ||२||
काळा डाग पडला मुखावरी
चंद्रमुखी, कधी चंदाराणी दिसे
सुख दुःखाचे नाते जडले तुझ्याशी
चांद्रायान तिसरे जात, मृगजळ भासे ||३||
अज्ञात वाटा ज्ञानाच्या कक्षेत
जगाला दिलेस ज्ञान भांडार
तुझ्या वरील खाचखळगे
मनाला पाडती खिंडार ||४||
भारताचा तिरंगा फडके अभिमानाने
शिवशक्ती विराजे चंद्रावरती
तुझ्या अंतरीची कोडी सोडवती शास्रज्ञ
जगी नांदती ज्ञानी भारती ||५||
— रचना : अंजली मस्करेन्हस. डहाणू
— संपादन : देवेंद्र भुजबळ. ☎️ 9869484800