“गंमत“
आई तुला सांगू का गंमत नंबर वन
ऐकून हसशील एकदम खुदकन
पावसाची एकदा हरवली छत्री
आपल्या घरी आला काल रात्री
आकाशात ढगांची पकडापकडी
मध्येच वीजेनं घातली लंगडी
पावसानं सारी शेतं झाली ओली
हिरवा टॉवेल पांघरून बसली
सकाळी झाडांना थंडी वाजली
धुक्याच्या शाली पांघरून बसली
कडक उन्हाने डोंगर तापले
टॅन होऊन काळवंडून गेले
भरभर भरभर फिरून आला वारा
म्हणाला डोकं फिरतंय गरागरा
खूप खूप थंडीत सूर्य गारठला
सकाळी त्याने लाल स्वेटर घातला
रात्री झाडांनी रंगीत कपडे बदलले
मग काळेपांढरे नाईटड्रेस घातले
हसून आई म्हणाली गमती झाल्या खूप
डोळे मिटून झोप बघू एकदम चूप !
— रचना : वेदवती कुलकर्णी. विलेपार्ले पूर्व. मुंबई.
— संपादन : देवेंद्र भुजबळ.
— निर्मिती : अलका भुजबळ. ☎️ 9869484800