कसे राहावे, कसे जगावे
जीवन फुलवित जावे
आयुष्याची वाट चालता
प्रमुदित मन व्हावे
बालपणी मज आई आजीने
शिकवण सुंदर दिधली
गोड गोड बोधकथा सांगूनी
नवीन दृष्टी दिधली
जीवन आपणा ज्याने दिधले
त्याचे गिरवित राहा तू धडे
निसर्ग निरखित राहा बायडे
त्यातून मिळतील धडे
उंचउंच गिरिराज चुंबिती
गगन ते निळेनिळे
कशी असावी गरुडभरारी
त्यातून मजला कळे
खोलखोल त्या द-या सांगती
नतमस्तक व्हावे
चिंतन मनन विवेकशक्तीने
प्रगल्भ वैचारिक व्हावे
खळखळ करुनि वेगाने त्या
निर्झरिणी वाहती
निर्मळ हास्ये बाल्य रमावे
निर्मळ व्हावी कृती
येवोत संकटे किती भ्रमणी
परी ना पथ सोडावा
मात करोनि ध्येयमार्ग परी
अपुला निश्र्चित गाठावा
– रचना : स्वाती दामले. बदलापूर
– संपादन : देवेंद्र भुजबळ. ☎️ 9869484800
