भारतरत्न, स्वरसम्राज्ञी लता मंगेशकर यांच्या वाढदिवसाच्या निमित्ताने विशेष अष्टाक्षरी रचना….
शत जन्मांची पुण्याई
पंचरत्ने ती जन्मली
मंगेशकरांच्या घरी
पाची जगात गाजली ||
लता आशा उषा मीना
बंधु तो हृदयनाथ
आई-बाबांचे आशिष
सरस्वती देई साथ ||
दुःख सोसले अपार
नाही केलीत तक्रार
मेहनत करोनियां
स्वप्ने केलीत साकार ||
सप्त सुरात फिरतो
लता दीदींचा हो गळा
गीत मधाळ गाऊनी
लावियला जगा लळा ||
गाणे कुठलेही असो
केला रियाज प्रचंड
तिन्ही सप्तकात गाणे
नाही गेले अवघड ||
गाणं कोकिळेच्या स्वरे
केली किमया सुरांनी
वृद्ध अबाल तरुण
जाती गीतात रंगोनी ||
मंगेशाच्या हो कृपेने
केली तुम्ही गाणं सेवा
भाषा कुठलीही असो
दिला प्रासादिक ठेवा ||
कल्पवृक्ष कन्या लता
काय वर्णावा महिमा
आवाजाने वेडे केले
आहे देशाची गरिमा ||
रूप सोज्वळ सात्विक
असे ते आनंदघन
सूर स्वर्गीय लाभले
हरपते तन-मन. ||
किती करावे कौतुक
पडे अपुरी लेखणी
लाभो उदंड आयुष्य
हीच आस आहे मनी ||
– रचना : सौ.मानिनी महाजन. मुंबई .
– संपादन : देवेंद्र भुजबळ. ☎️ 9869484800
सुंदर काव्य मानिनी