ओठावरचं गाणं…

नमस्कार 🙏
“ओठावरचं गाणं” या सदरात सर्व रसिक श्रोत्यांचं स्वागत. काही काही गाणी ही आपल्या मनातल्या भावना अगदी सहजपणे व्यक्त करतात. आज पाहू या आरती प्रभू यांच्या या गाण्याचं रसग्रहण.

गाण्याचे शब्द आहेत.

नाही कशी म्हणू तुला म्हणते रे गीत
परी का रे हलक्या ने आड येते रीत

एकमेकांच्या प्रेमात आकंठ बुडालेले हे दोन प्रेमी जीव आहेत. त्यांना एकमेकांसाठी बरंच काही करायचं आहे. माझ्या मनात खूप काही आहे कि आपण एकमेकांच्या बाहुपाशात असावं, तुला जसं वाटतं आहे ना तसंच मलाही तुझ्यासाठी गाणं म्हणावसं वाटतंय. आपलं नवीन लग्न झालं असलं तरी आम्हा स्त्रियांना काही सामाजिक रीतीरिवाज पाळायला लागतात, उच्छृंखल पणे वागून चालत नाही. त्यामुळे मनात खूप काही असलं तरी आम्हा स्त्रियांना ते उघडपणे बोलता येत नाही.

नाही कशी म्हणू तुला येते जरा थांब
परी हिरव्या वळणांनी जायचेच लांब

तू थोडासा धीर धर ना राजा ! आपण दोघेही हातात हात घालून, रमतगमत, गप्पा मारत फिरायला जाऊ. नक्की जाऊयात …. पण मी सांगेन तिथे आणि फिरायला म्हणजे भटकायला आवडतं मला. आपण कुठे तळ्याच्या काठावर हातात हात घेऊन अजिबात बसायचं नाही तर आपल्या दोन्ही बाजूला हिरवीगार झाडं आहेत आणि नागमोडी वळणं घेत जाणा-या रस्त्याने आपण दोघेही भटकंती करायला निघालो आहोत असं माझंही एक स्वप्न आहे, जे मला तुझ्यासोबत पूर्ण करायचं आहे.

नाही कशी म्हणू तुला, माळ मला वेणी
परी नीट, ओघळेल, हासतील कोणी

मला ठाऊक आहे तुला कधीची माझ्या लांबसडक केसात वेणी माळायची आहे…..ते ही तुझ्या मनातलं स्वप्न आज मी पूर्ण करणार आहे. फक्त तुझा धसमुसळेपणा जरा बाजूला ठेव आणि नाजूक हातांनी जर तू माझ्या केसात वेणी माळलीस तरच ती टिकेल…. नाहीतर कशीतरी घिसाडघाईने जर वेळ मारून नेलीस तर आपण थोडंसं अंतर चालून जात नाही तोवर ती केसांवरून उतरून रस्त्यात कुठेतरी ओघळून जाईल आणि लोक तर तुलाच हसतील

नाही कशी म्हणू तुला जरा लपूछपू
परी पायातच काटे लागतात खुपू

तू म्हणशील त्या प्रत्येक गोष्टीला माझा होकार आहे, माझी पूर्ण संमती आहे. आपण फिरायला जाऊ या, गप्पा मारू या, लपाछपी सुद्धा खेळू पण खेळताना माझ्या पायाला जर दगड बोचले किंवा धावताना पायात काटा रूतला आणि तो जर खुपायला लागला तर हळुवार हाताने तू तो काढायला पाहिजेस.

नाही कशी म्हणू तुला विडा रे दुपारी
परी थोरांच्या समोर घ्यायची सुपारी

आता तुला गुपीत सांगू ? तुझ्यासाठीच तर मी गोविंद विडा बनवून ठेवला आहे. थोड्या वेळाने माजघरात हळूच कुणाला कळू न देता मागच्या दाराशी ये….. तिथे मी तुला तो देईन. पण आत्ता शहाण्यासारखा वाग आणि सासूबाई आणि सासरे म्हणजे तुझे आई बाबा समोर बसले आहेत याचं भान ठेव आणि ही सुपारी घेऊन गप्प रहा.

नवीन लग्न झालेल्या तरुणीच्या मनातले हे विचार आरती प्रभूंनी किती सहजतेने व्यक्त केले आहेत आणि ह्रदयनाश मंगेशकर यांनी संगीतबद्ध केलेलं हे गाणं लता मंगेशकर यांनीही तितक्याच समंजस आवाजात गायलं आहे.

– लेखन : विकास मधुसूदन भावे
– संपादन : देवेंद्र भुजबळ 9869484800