आता लतादीदींकडून मुंबई महापालिकेचे कौतुक

गेल्या वर्षभरापासून कोरोनाने जगाला छळले आहे. भारताची आर्थिक राजधानी असलेली मुंबई सुध्दा यातून सुटली नाही. भारतातील कष्टकऱ्यांचं मुंबई हे रोजगारासाठी हक्काचे ठिकाण आहे. त्यामुळे साहजिकच येथील लोकसंख्या सतत वाढती आहे. या पार्श्वभूमीवर मुंबई महानगरपालिकेने ज्या पद्धतीने कोरोनाशी लढा दिला आहे आणि देत आहे, त्याचे सर्व थरातून कौतुक होत आहे. सर्वोच्च न्यायालयाने देखील प्रशोंसदगार काढले आहेत.

आता खुद्द भारतरत्न गानकोकिळा लता मंगेशकर, यांनी वांद्रे कुर्ला संकुल येथील बृहन्मुंबई महानगरपालिकेच्या, जंबो कोविड’ रुग्णालयाच्या कामाचे कौतुक केले आहे. हे कौतुक केवळ शाब्दीकच नसून दिदींनी स्वहस्ताक्षरात वांद्रे-कुर्ला कोविड रुग्णालयाचे अधिष्ठाता डॉक्टर राजेश डेरे यांना शुभेच्छा पाठविल्या दिल्या आहेत.

वांद्रे कुर्ला संकुल येथील जंबो कोविड रुग्णालयामध्ये आजवर २२ हजार नागरिकांवर मोफत करण्यात आले तर सुमारे २ लाख ५० हजार नागरिकांचे लसीकरण करण्यात आले आहे.

आपल्या पत्रात दिदींनी नमूद केले आहे की, “आपण महाराष्ट्रासाठी, दिवस-रात्र काम करत आहात. ईश्वर तुम्हाला सदा सुखी ठेवो, अशी मी मंगल कामना करते…”.

दिदींच्या कौतुक भरल्या व शाबासकीची थाप देणाऱ्या या पत्रामुळे आम्हा सर्वच वैद्यकीय कर्मचाऱ्यांना अधिक जोमाने रुग्णसेवा करण्याचे बळ मिळाले आहे, अशी नम्र भावना डॉक्टर डेरे यांनी यानिमित्ताने आवर्जून व्यक्त करत, भारतरत्न दिदींचे आभार मानले आहेत.

महाराष्ट्राचे मुख्यमंत्री श्री उद्धव ठाकरे यांच्याहस्ते दिनांक १८ मे २०२० रोजी ‘एम.एम.आर.डी.ए.’ने उभारलेल्या या कोविड समर्पित रुग्णालयाचे बृहन्मुंबई महानगर पालिकेकडे हस्तांतरण करण्यात आले होते. तेव्हापासून आजतागायत या रुग्णालयात अव्याहतपणे कोविड बाधितांची सेवा व त्यांच्यावर आवश्यक ते औषधोपचार केले जात आहेत. गेल्या वर्षभरात या रुग्णालयात साधारणपणे २२ हजार इतक्या कोविड बाधित रुग्णांवर उपचार करण्यात आले आहेत. तर याच ठिकाणी कार्यरत असलेल्या कोविड प्रतिबंधात्मक लसीकरण केंद्रात नियमितपणे लसीकरण करण्यात येत असून आजवर सुमारे २ लाख ५० हजार लशीच्या मात्रा याठिकाणी देण्यात आल्या आहेत.

अत्यंत अल्पावधीत उभारण्यात आलेल्या या रुग्णालयात तब्बल २ हजार २०८ खाटा आहेत. यामध्ये ८६८ ऑक्सीजन बेड असून १२० अतिदक्षता रुग्णशय्या आहेत. याचबरोबर ६७ रुग्णशय्यांना ‘व्हेंटिलेटर सपोर्ट’ देखील आहे. या व्यतिरिक्त ज्या कोविड बाधित रुग्णांना नियमितपणे डायलिसिसची गरज असते, अशा रुग्णांसाठी स्वतंत्र व्यवस्था असून त्यासाठी १२ रुग्णशैय्या राखीव ठेवण्यात आल्या आहेत. या ठिकाणी दिवसाचे २४ तास व आठवड्याचे सातही दिवस यानुसार साधारणपणे ३७८ डॉक्टर्स, ३९९ परिचारिका व ५१३ वैद्यकीय कर्मचारी कार्यरत आहेत. रुग्णालयाच्या इतर व्यवस्थेसाठी २०० कर्मचारी कार्यरत असून १५२ सुरक्षारक्षक तैनात आहेत. तसेच या रुग्णालयासाठी स्वतंत्र रुग्णवाहिका देखील सदोदित कार्यतत्पर आहेत.
आता दस्तुरखुद्द लतादिदींनीही कौतुक केल्यामुळे महापालिकेला निश्चितच अधिक बळ मिळाले आहे.

– देवेंद्र भुजबळ. 9869484800.