तू बुद्ध आहे…

तू बुद्ध आहे तू बुद्ध आहे तू बुद्ध ….
साऱ्या मानवतेचा….
ना भेदभाव ना पंथभेद तू तारक, अखिल विश्वाचा …

तुज समिप आला जो जो तो, तुझाच होऊनी रे गेला
जिंकले विश्व नि कलिंग जरी शेवटी फकिर तो झाला…

उघडूनी कवाडे ज्ञानाची, दाविशी दिवा प्रकाशाचा
तुजमुळे थांबला विनाश पुढचा फाकला प्रकाश तो ज्ञानाचा..

येथे ना शाश्वत काही ही सारेच प्रवासी दो घडीचे
जिंकाया निघती माती पाणी जे आहे साऱ्या विश्वाचे …

रे कोण येथला मालक सांगा घेऊनी गेला तो सोबती सारे
मातीच झाली साऱ्यांची हे समजण्यास, विनाश सांग का बरे ?

बुद्धाचा मार्ग तो, अनुसरता रे गळूनी पडती दंभ जगी
वाटली तुझी शिकवण सोपी गुंगते पहा पण सारी मती …

लोभाची मांजरे सारी येथे, रे कशी पचावी शिकवण
जाहला प्रसार नि प्रचार जिथे, जोडती साम्राज्याचे धन ..

तू नाही सोपा बुद्धा रे, वरवरचे सारे वर्ख इथे
काढताच पापुद्रा वरचा, भळभळते बघ ना रक्त तिथे…

तुज पचवावा ऐसा सुज्ञ इथे..? नाही रे नाही कोणी
तुज बुडवून बघना, डोक्यावरूनी गेले रे येथे किती पाणी ..

पण तरी ही तू …
ठाम रहा …तुझी शिकवण सारी “मानवता”
निपजेल बघ रे कुणी तरी
घेईल ध्वज रे पुन्हा हाता

– रचना : प्रा.सौ.सुमती पवार. नाशिक