“भावेश भाटिया”
काही व्यक्ती जन्माला येतात स्वतःसाठी…
काही आपल्या कुटुंबासाठी जगतात…
परंतु काही दुर्मिळ व्यक्तिमत्त्वे अशी असतात जी संपूर्ण समाजासाठी प्रेरणा बनतात.
श्री. भावेश भाटिया हे असेच एक तेजस्वी, प्रेरणादायी आणि अभिमानास्पद व्यक्तिमत्त्व आहे.
जगातील अत्यंत प्रतिष्ठित समजल्या जाणाऱ्या TIME100 Summit आणि Gala Event, न्यूयॉर्क या जागतिक मंचावर भारताचे प्रतिनिधित्व करून श्री. भावेश भाटिया नुकतेच भारतात परतले आहेत. TIME100 Summit आणि Gala Event मध्ये जगातील प्रभावशाली व्यक्ती, उद्योजक, राजकीय नेते, वैज्ञानिक, कलाकार आणि विचारवंत उपस्थित होते. अशा मंचावर भारतीय पारंपरिक कॅन्डल मेकिंग आर्टचे प्रतिनिधित्व करण्यासाठी श्री. भावेश भाटिया यांना निमंत्रित करणे म्हणजे, भारतीय जिद्दीचा सन्मान, भारतीय दिव्यांग सामर्थ्याचा गौरव. भारतीय कारागिरीचा जागतिक स्वीकार हा क्षण प्रत्येक भारतीयासाठी अभिमानाचा आहे.
TIME या जागतिक कीर्तीच्या संस्थेकडून त्यांचा सन्मान होणे ही केवळ एका व्यक्तीची उपलब्धी नाही, तर ती संपूर्ण भारतासाठी गौरवाची, अभिमानाची आणि प्रेरणेची बाब आहे.
संघर्षातून निर्माण झालेली प्रेरणेची गाथा ज्यांच्या जीवनात अंधार होता, त्यांनीच इतरांच्या आयुष्यात प्रकाश निर्माण केला—
ही ओळ जर कोणासाठी खरी ठरत असेल, तर ती श्री. भावेश भाटिया यांच्यासाठी.
स्वतः दिव्यांग असतानाही त्यांनी आपल्या आयुष्याला कधीही मर्यादांचे बंधन मानले नाही. त्यांनी परिस्थितीवर रडण्याऐवजी परिस्थिती बदलण्याचा निर्धार केला. त्यांनी सिद्ध केले की माणसाला शारीरिक मर्यादा असू शकतात, पण त्याच्या इच्छाशक्तीला कोणतीही मर्यादा नसते. “सनराईज कॅन्डल्स” हा एक उद्योग नव्हे, सामाजिक क्रांती महाबळेश्वर येथे त्यांनी उभी केली. ही संस्था आज केवळ व्यावसायिक यशाचे उदाहरण नाही; ती एक सामाजिक क्रांती आहे.
ज्या समाजात दिव्यांगत्वाला अनेकदा कमजोरी समजले जाते, त्या समाजात श्री. भावेश भाटिया यांनी दिव्यांगत्वालाच सामर्थ्यात रूपांतरित केले. आज त्यांच्या माध्यमातून 3000 हून अधिक दिव्यांग बांधवांना रोजगार मिळाला आहे.
याचा अर्थ—3000 कुटुंबांच्या घरात स्वाभिमान पोहोचला आहे. 3000 लोकांना दये ऐवजी संधी मिळाली आहे. 3000 आयुष्यांना आत्मनिर्भरतेचा प्रकाश मिळाला आहे.
सनराईज कॅन्डल्स ने आजवर 13,000 हून अधिक प्रकारच्या कॅन्डल्स तयार करून भारतीय कौशल्य, सर्जनशीलता आणि गुणवत्ता यांचा जगासमोर नवा आदर्श ठेवला आहे.येथील प्रत्येक मेणबत्ती ही केवळ उत्पादन नसते—ती एका संघर्षाचा विजय असते. एका स्वप्नाचा आकार असते. एका आत्मविश्वासाचा प्रकाश असते.
श्री. भावेश भाटिया यांच्या अद्वितीय कार्याची दखल देशाच्या सर्वोच्च स्तरावर घेण्यात आली असून त्यांना चार वेळा राष्ट्रपती पुरस्कार प्राप्त झाले आहेत. हा सन्मान केवळ उद्योगासाठी नाही, हा सन्मान आहे मानवतेसाठी. हा सन्मान आहे दिव्यांग सक्षमीकरणासाठी. हा सन्मान आहे संघर्षाला यशात बदलणाऱ्या विचारांसाठी.
श्री. भावेश भाटिया हे उद्योजकतेबरोबरच एक अत्यंत प्रभावी प्रेरणादायी वक्ते म्हणूनही प्रसिद्ध आहेत. त्यांच्या भाषणात अनुभव असतो, शब्दांत सत्य असते. त्यांच्या कथेत परिवर्तन घडवण्याची ताकद असते… त्यांचे प्रत्येक वाक्य हे संघर्ष करणाऱ्या व्यक्तीसाठी उभारी देणारे असते.
महाबळेश्वरला जाणारे पर्यटक निसर्ग अनुभवण्यासाठी जातात; परंतु जे सनराईज कॅन्डल्स ला भेट देतात, ते प्रेरणा घेऊन परततात. हे ठिकाण जिद्दीचे मंदिर आहे. आत्मविश्वासाचे विद्यापीठ आहे. संघर्षातून यश कसे घडते याचे जिवंत उदाहरण आहे.
महाबळेश्वरला जाणाऱ्या प्रत्येकाने आवर्जून सनराईज कॅन्डल्सला भेट द्यावी, कारण ते फक्त एका उद्योगाचे ठिकाण नसून प्रेरणेचा दीपस्तंभ आहे. श्री. भावेश भाटिया यांना मनःपूर्वक अभिवादन. सर, आपण केवळ स्वतः यशस्वी झालात असे नाही, तर आपण हजारो लोकांना यशस्वी होण्याचा मार्ग दिलात. आपण केवळ व्यवसाय उभा केला नाही, तर आपण आत्मविश्वासाची चळवळ उभी केली. आपण केवळ मेणबत्त्या बनवल्या नाहीत, तर आपण हजारो आयुष्यांत आशेचा प्रकाश प्रज्वलित केला.
आज भारतातील प्रत्येक तरुणाने, प्रत्येक उद्योजकाने, प्रत्येक संघर्ष करणाऱ्या व्यक्तीने श्री. भावेश भाटिया यांच्याकडून एक गोष्ट शिकावी,
“परिस्थिती तुमचे भविष्य ठरवत नाही;
तर तुमची जिद्द तुमचे भविष्य ठरवते.”
श्री. भावेश भाटिया सर, आपल्या या जागतिक गौरवाबद्दल मनःपूर्वक अभिनंदन !
आपण भारताचा अभिमान आहात…
आपण लाखो लोकांची प्रेरणा आहात…
आणि आपण खऱ्या अर्थाने प्रकाशाचे शिल्पकार आहात.
“सनराईज कॅन्डल्स म्हणजे केवळ एक ब्रँड नाही…
ती संघर्षातून निर्माण झालेल्या प्रकाशाची क्रांती आहे.”
— लेखन : महेबूब कासार.
निवृत्त वस्तूकर उपायुक्त. नवी मुंबई.
— संपादन : देवेंद्र भुजबळ.
— निर्माती : सौ अलका भुजबळ. ☎️ 9869484800