आला आला रे पाऊस आला
बळी राजास आनंद झाला ll ध्रु ll
मेघराजे कृपा केली वर्षा राणी वर्षली,
धरा झाली ओली झाडे झुडपे थरथरली ll
थेंबाने शोभली हर्षे डूलू लागली ll
चला त्वरे जाऊ भिजनीया घेऊ,
मन मोर मुदे नाचला
बळी राजास आनंद झाला ll१ll
पेरा होईल आता कष्टे अन्नदाता अंकुरेल बीज ll
क्षणोक्षणी आशा पुरवील मनिषा,
काळी आई सहज अधिक पिकेल धान्य,
दूर होईल दैन्य, दुवा मागे तो ईश्वराला
बळीराजास आनंद झाला ll२ll
धरणे नद्या भरू दे, पाणी साठा होऊ दे,
जगण्या चराचराला, हवा तसाच बरस मेघा ll
नको करू उगा त्रागा विनंती असे तुजला,
आता काळी आई हिरवा शालू लेई,
देई आनंद साऱ्या जगाला
बळीराजास आनंद झाला ll३ll
— रचना : अलका मोहोळकर. पंढरपूर
— संपादन : देवेंद्र भुजबळ.
— निर्मिती : अलका भुजबळ. ☎️ 9869484800